పాకిస్తాన్ కు రుణం వెనుక అమెరికా!?

అంతర్జాతీయ ద్రవ్య నిధి/తాజాగా (IMF) పాకిస్తాన్‌కు 1 బిలియన్ డాలర్ల నిధులను విడుదల చేసింది. ఇది 7 బిలియన్ డాలర్ల ఆర్థిక సహాయ కార్యక్రమం కింద రెండవ విడత. ఈ నిధులు పాకిస్తాన్ ఆర్థిక వ్యవస్థను స్థిరీకరించడానికి ఉద్దేశించినవి. అదే సమయంలో స్థిరత్వం సుస్థిరత సౌకర్యం (RSF) కింద 1.4 బిలియన్ డాలర్ల రుణం ఆమోదించారు. ఈ రుణం వాతావరణ సవాళ్లను ఎదుర్కోవడానికి సహాయపడుతుంది. అయితే ప్రస్తుతం భారత్- పాక్ దేశాల మధ్య తీవ్ర ఉద్రిక్తతలు నెలకొన్న నేపథ్యంలో ఈ రుణ మొత్తాన్ని పాకిస్తాన్ ఆయుధాల కొనుగోలుకు ఉపయోగిస్తుందన్న అనుమానాలు వ్యక్తమవుతున్నాయి. ఈ రుణ ఆమోదం వెనుక అమెరికా ప్రభావం ఉందనే అనుమానం బలంగా ఉంది. నేరుగా ఆధారాలు లేనప్పటికీ కొన్ని చారిత్రక సందర్భాలు ఈ ఊహాగానానికి బలం చేకూరుస్తాయి.

IMFలో అమెరికాకు 16.49% ఓటింగ్ శక్తి ఉంది. ఇది సంస్థలో అత్యధికం. ఈ ఓటింగ్ శక్తి ద్వారా అమెరికా నిర్ణయాలను గణనీయంగా ప్రభావితం చేయగలదు. 2023లో పాకిస్తాన్‌కు 3 బిలియన్ డాలర్ల రుణ ఒప్పందం సమయంలో అమెరికా ఆర్థిక శాఖ ఆమోదం తర్వాతే ఒప్పందం కుదిరిందని లీక్ అయిన డాక్యుమెంట్లు సూచించాయి. ఈ ఉదాహరణ అమెరికా పాత్రను స్పష్టం చేస్తుంది. 1990లలో కూడా పాకిస్తాన్‌కు IMF రుణాలు ఇవ్వడంలో అమెరికా మద్దతు కనిపించింది. ఆ సమయంలో భారత్ అభ్యంతరాలను పక్కనపెట్టి రుణాలు మంజూరు చేసారు. ఈ చరిత్ర అమెరికా ప్రభావాన్ని బలపరుస్తుంది.

భారత్ పాకిస్తాన్ యుద్ధ సమయంలో ఈ రుణాలపై భారత్ తీవ్ర అభ్యంతరాలు వ్యక్తం చేసింది. పాకిస్తాన్ ఈ నిధులను ఉగ్రవాద కార్యకలాపాలకు ఉపయోగించవచ్చని భారత్ ఆందోళన వెలిబుచ్చింది. భారత్ ఓటింగ్ నుండి తప్పుకుంది. అయినప్పటికీ IMF బోర్డు నిర్ణయం అమెరికా సహా ఇతర సభ్య దేశాల మద్దతుతో ముందుకు సాగింది. ఈ సందర్భం అమెరికా పాత్రను మరింత స్పష్టం చేస్తుంది. భారత్ అభ్యంతరాలను నిర్లక్ష్యం చేయడం అమెరికా భౌగోళిక రాజకీయ లక్ష్యాలను సూచిస్తుంది. దక్షిణాసియాలో చైనా ప్రభావాన్ని సమతవుల్యం చేయడం లేదా పాకిస్తాన్‌ను ఆర్థిక సంక్షోభం నుండి కాపాడటం ఈ లక్ష్యాలలో భాగం కావచ్చు. అమెరికా పాకిస్తాన్‌కు మద్దతు ఇవ్వడం వెనుక రాజకీయ లెక్కలు స్పష్టంగా కనిపిస్తాయి. పాకిస్తాన్ ఆర్థిక సంక్షోభం చైనాపై ఆధారపడటాన్ని పెంచుతుంది. ఇది అమెరికా భౌగోళిక లక్ష్యాలకు వ్యతిరేకం. అందుకే అమెరికా IMF ద్వారా పాకిస్తాన్‌ను ఆదుకోవడానికి మొగ్గు చూపుతుంది.

పాకిస్తాన్ ఆర్థిక సంస్కరణలు రుణ ఆమోదానికి కారణమని IMF పేర్కొంది. ట్యాక్స్ సేకరణ ఇంధన ధరల సవరణలు ఇందులో కీలకం. అయినప్పటికీ ఈ నిర్ణయాలలో రాజకీయ ప్రభావం తప్పదు. అమెరికా ఓటింగ్ శక్తి చారిత్రక ఉదాహరణలు ఈ ఊహాగానానికి బలం చేకూరుస్తాయి. IMF నిర్ణయాలు సమిష్టి ఒప్పందంపై ఆధారపడినప్పటికీ అమెరికా పాత్రను కాదనలేం. ఈ రుణాలు పాకిస్తాన్ ఆర్థిక స్థిరత్వానికి సహాయపడవచ్చు. అయితే భారత్ పాకిస్తాన్ యుద్ధం జరుగుతున్న ప్రస్తుత పరిస్థితుల్లో ఈ రుణాలు ఉద్రిక్తతలను మరింత పెంచుతాయి. పాకిస్తాన్ ఆర్థిక బలవంతం కావడం యుద్ధాన్ని జటిలం చేస్తుంది. భారత్ ఆందోళనలను పక్కనపెట్టడం దక్షిణాసియా రాజకీయ సమతుల్యతను సంక్లిష్టం చేస్తుంది. అమెరికా తన ఆధిపత్యాన్ని కొనసాగించాలని భావిస్తున్నప్పటికీ ఈ రుణాలు రాజకీయ వ్యూహాల భాగంగా యుద్ధ ఉద్రిక్తతలను తీవ్రతరం చేయవచ్చు.

—- శ్రీనివాస్ గౌడ్ ముద్దం, ఫైనాన్స్ బిజినెస్ లో నిపుణులు, ఓనర్: ఫిన్ నౌ